Certo.es

A_tía_Casiana

A miña tía Casiana é moi mal falada. Cando era moza eu tíñalle noxo e dábame vergonza allea oíla falar. Agora que semella ser máis vella que o mundo, encántame.

Estes días estivo mala a muller.

- Cómo está hoxe tía?, bérrolle porque ben non oe.

- Ando como a cona! As túas curmáns non me deixan saír da casa.

- E logo.. onde quería ir?

- Eu non valo para estar coa cona descansada.

- Pero muller, vai moito frío para saíres.

- Eu frío non teño desque puxemos a calefacción. Se o finado do teu tío me mirara, moito había de rir ao verme co coño quente!

Miña tía Casiana clasifica os estados de humor segundo estean os xenitais femininos e endexamais usa eufemismos.

Fala Casiana:

- A min gústame ir mercar o peixe a Rianxo. Agora vai a miña neta e as peixeiras fan dela un pandeiro... Esa nena ten a cona de manteiga. Á miña filla non lle podo dicir nada porque anda coa cona revirada e faime calar.

A tía Casiana é unha fungona:

- E a cona seca da Inés non me deixa achegar á cociña.

- É que vostede manda moito!

- Déixate de conachadas, eu non mando nada nin aquí nin acolá.

- Ben que a coidan as miñas primas!

- Ide rascar a cona por ai adiante todas vós! Queredes facer de min unha vella!

Flickr de HBierau

Como lle tire da lingua fálame da veciña que se divorciou, e di que ten a cona de unto, fálame da súa irmá, que non quere xogar á brisca e iso convértea nunha cona encoirada; fala da nora, que non se ergue da mesa para recoller aos domingos e di que anda coa cona cansa.

Se unha moza xa polea, a tía di que lle pinga a cona e se sae de noite á discoteca, di que anda a ensinar a cona por ai adiante.

- Tía, onde lle aprenderon a dicir tantas veces cona?

- Ai, nena! Cala oh! Ti andas sempre coa cona esfameada.

Non lle falta razón á tía.

Máis relatos de Susana Moo para Certo, aquí

---